Ексклузивна биографија на светицата од Скопје Мајка Тереза
Авторката Јасмина Миронски:
„Гонџа Агнеса (Агнес) Бојаџиу од Скопје го посвети својот живот на работата по калливите предградија на Индија и светот, грижејќи се и дарувајќи им љубов на најсиромашните од сиромашните, најзаборавените од заборавените, на најосамените од осамените, и стана Светицата Тереза од Калкута. За необичната скопјанка и за нејзината младост во родниот град многу малку беше напишано за време на нејзиниот живот, што ми беше поттик да започнам со ова истражување, во 90-тите години од минатиот век. Веднаш се соочив со фактот дека не само што недоволно се знае за нејзината младост, туку речиси сите документи за нејзиното семејство биле уништени за време на војните, на поделбите, преселбите, поплавите, како и во катастрофалниот земјотрес што го погоди Скопје (1963). Истовремено, достапните податоците што останале се често непрецизни, контрадикторни и нецелосни. Во времето на моето детство таа беше синоним за нешто добро и хумано иако сосема непознато. Нејзиното име го среќававме од мали, но за нејзината работа и за нејзиниот личен живот не знаевме многу. Повеќегодишните истражувањата во Скопје, а потоа и во Калкута, Индија, за време на престојот на нејзиниот погреб, ми овозможија да приложам една посеопфатна слика и за неа, и за нејзината необична животна определба втемелена во Индија и проширена низ светот.“
„Мојата работа тоа сум јас, само тоа е важно“ велела Мајка Тереза, како одговор на прашањата за нејзиното минатото и за потеклото. Во книгава, низ неколкуте поглавја читателите ќе можат да се запознаат со необичното патешествие на Гонџа кое започнало со сонот за определбата кон Бога низ калдрмисаните улици на старото Скопје, сон што ѝ овозможил да стане Мајка Тереза од Калкута ˗ синоним за тоа како сесрдно и безрезервно им се помага на оние на кои помошта им е најмногу потребна. Таа за многумина претставуваше светица уште додека рабо- теше по предградијата на Калкута или Колката како што денес се вика градот, а живееше во согласност со старите канонски правила; побожна, совесна, кревка, едноставна. За поголемиот дел од светот, стана светица на денот кога почина – 5 септември 1997 година. Потврдата за тоа следеше со нејзината беатификација на 19 октомври 2003, а потоа и со нејзиното офи- цијално прогласување за светица односно канонизација на 4 септември 2016 година во Рим. Присуството на овие два настана, проследени и со други придружни манифестации меѓу кои и првата историска посета на папата Франциск на Скопје на почетокот на мај 2018 година ми овозможи да го заокружам нејзиниот земен и вечен живот. На крајот би истакнала дека и покрај низата документи, кажувањата на наследниците од нејзиното семејството во Скопје, на милосрдните сестри во Калкута и во Скопје, како и на моите автентични доживувања од големите настани пов- рзани со нејзиното име, сепак животниот пат на Мајка Тереза ми остава можност за натамошни истражувања и соочувања со нејзините подвизи и непознаници.